Taliwala sa padayon nga pagsaka sa presyo sa petrolyo ug mga pamaliton, naghatag og kahupayan sa mga Tagumenyo ang Service Caravan nga gipasiugdahan sa opisina ni Vice Governor Clarice Jubahib uban sa One DavNor Association of Women.

Kabahin kini sa pagsaulog sa National Women’s Month, nga nagtumong sa paghatag og libreng serbisyo alang sa kababayen-an sama sa breast screening, eye check-up, dental services, ug uban pang medical assistance.

Sa pahayag ni Vice Governor Jubahib, gipasalig niya nga padayon ang ilang paningkamot sa paghatag og serbisyo sa katawhan sa Davao del Norte pinaagi sa medical assistance, burial assistance, ug uban pang programa.

Gidasig usab niya ang mga kababayen-an nga pahimuslan ang mga libreng serbisyo, ilabina nga kasagaran wala na silay panahon alang sa ilang kaugalingong kahimsog tungod sa pag-atiman sa pamilya.

Samtang nagpadayon ang nasud sa pag-atubang sa krisis sa ekonomiya, gipahayag sa bise gobernador nga ang probinsiya andam motabang ug magpadayon sa pagpangita og paagi aron masuportahan ang panginabuhi sa mga Dabaonon.