Tungod sa grabing pagbaha nga resulta sa shearline niadtong bulan sa Pebrero, gitunol sa Probinsyal nga Panggamahanan sa Davao del Norte ang relief assistance gikan sa Office of Civil Defense (OCD) ngadto sa mga apektadong pamilya sa lungsod sa Carmen, gahapong adlawa, Abril 6.
Gimandoan gyud ni Governor Edwin "Kuya Gob" Jubahib ang mga responsableng personahe ug ahensya sa kapitolyo nga ihatud ang maong tabang aron magamit kini nga konsumo sa mga katawhan.
Personal usab nga miadto si Vice Governor Clarice "Clang-Clang" Jubahib sa mga kabarangayan aron ihatud ang hinabang.
Sa iyang mensahe, iyang gipaabot sa tanang katawhan sa lugar nga padayon ang suporta sa probinsya sa mga naapektuhan sa kalamidad ug ang plano sa panggamhanan alang sa pagpatuman sa flood control projects.
“Naa mi dri maghatud mi ni Governor Edwin Jubahib og hinabang para sa tanang affected families tung niaging sunod-sunod na ulan... ayaw mog kabalaka kay naay giloan karon ang province para sa flood control project... so ako lang ihangyo sa inyoha nga saligi lang gyud ninyo nga naay gobyerno nga nangitag pamaagi nga masulosyonan tanan problema nga atong giatubang karon,” matud ni VG Clarice
Unom ka barangay ang naadtoan sa maong programa ug adunay kinatibuk-ang 1,115 ka pamilya ang nakabenepisyo niini.
Sumala ni Provincial Social Welfare and Development Officer Rosalinda Rapista, ang listahan sa mga benepisyaryo gikan sa mga barangay ug gipasa sa Municipal Social Welfare and Development Office (MSWDO) padulong sa Provincial Disaster Risk Reduction and Management Office (PDRRMO) alang sa pinal nga beripikasyon.
Ingun ni Lapaz Barangay Captain Rogelio Libre Jr., dakong kahupayan sa ilang katawhan ang relief assistance ilabi na sa mga panimalay nga nasudlan gayud og tubig baha ug naglisod sa pagbangon human sa kalamidad.
Si Lovella Mangacop ug Judith Eco nga taga Mabaos, mapasalamaton sa bugas nga ilang giingong dakong tabang ilabi na karon nga nagasaka ang presyo sa mga palaliton.
"Dako kayo atong pasalamat sa atong probinsyal sa bisan sa kakulian nahitabo wala jud sila nag kuan sa pagtabang sa ilang kasing- kasing jud nga wa jud nila gipasagdan ang mga tao," ingun ni Mangacop
"Daghan kayo mig pasalamat sa panggamhanan kay bisag layo mi nga lugar maabot mi nila sa ilang hinabang," sumala ni Eco
