Gikasa na sa Probinsiyal nga Panggamhanan sa Davao del Norte ang implementasyon sa 12 ka mga dagkong proyektong pangkalamboan, human aprobahan sa Land Bank of the Philippines (LandBank) ang P2.5 billion nga loan sa probinsiya alang niini.
Butyag ni Governor Edwin “Kuya Gob” Jubahib nga tumong sa maong loan nga pakusgan ang economic enterprise, kon kita sa probinsiya aron sa mas lig-on nga paghatud serbisyo sa katawhan ug alang usab sa paspas nga kalamboan sa mga barangay.
“Naa ni purpose tungod kay gibutang nato ni nga economic enterprise. Meaning, ang tanan natong gi-loan naay kita ug mapuslan usab sa katawhan ug ang uban usab ihatag nato para sa mga barangay projects. Kini public service alang sa tanang barangays ug sa atong mga constituents sa Davao del Norte,” sulti sa gobernador.
Lakip niini ang P300 million Davao del Norte Convention Center with Dormitory sa Tagum City, P270 million 2-Storey Davao del Norte Multi-Purpose Coliseum, ug P120-million Provincial Training Center with Dormitory sa Samal.
Apil sab ang P500 million para sa counterpart sa probinsiya sa Philippine Rural Development Project (PRDP) Scale-up ug Mindanao Inclusive Agriculture Development Project (MIADP); P400 million alang sa flood control projects, P450 million infrastructure support alang sa mga barangay ug uban pa.
“So, kanang tanan economic enterprise of the province, in support sa atong Zero-Billing Program sa atong tulo ka mga provincial hospitals. Kay gi-libre man nato ang serbisyo sa atong mga hospital,” ingon ni Kuya Gob.
Dugang ni Kuya Gob nga importante kaayo ang implementasyon sa mga local projects, labi na karong panahona nga nadelatar ang bidding sa mga projects sa Department of Public Works and Highways (DPWH).
“Sa atoa sa Davao del Norte, giingganyo nato ang atong mga local chief executives nga paspasan nato ang implementasyon sa atong mga local projects from local funds para nga makapadayon ang pagtrabaho dinhi sa probinsiya. Duna gihapoy nagaikot nga kwarta nga maoy magsilbi karon sa atong economic system,” ingon niya.
Sulti ni Charlotte Conde, LandBank Executive Vice President on National Development Lending Sector, nga usa sa ilang bilibhon nga kliyente ang probinsiyal nga panggamhanan sa Davao del Norte kay maayo kining mobayad sa mga loans.
“Our partnership with the provincial government of davao del Norte dated way, way back. So, basically what you can see… all the (big) projects of the provincial government is funded by landbank… Very, very good client of the Bank. Very satisfactory payment…,” ingon sa opisyal.
