Nakapasar ang Probinsyal nga Panggamhanan sa Davao del Norte sa unom ka prayoridad nga aspeto sa pagpatuman sa Health and Wellness Program human sa gipahigayonh Healthy Workplace Validation sa Department of Health–Davao Center for Health Development (DOH-DCHD) niadtong Abril 22 sa Audio-Visual Room, Old Legislative Building sa Government Center, Mankilam, Tagum City.
Gipangunahan ni Provincial Human Resource Management Officer Edwin Palero ug Provincial Health Officer Dr. Alfredo Lacerona lakip usab ang mga kaubanan sa PHO sama ni Dr. Kristine Nicole Hortel, ang presentasyon sa mga dokumento nga nagpamatuod sa epektibong implementasyon sa mga programa alang sa kahimsog ug kaayohan sa mga empleyado sa kapitolyo. Dugang pa, gipadayag sa Provincial Health Office ang lig-on nga suporta sa probinsya pinaagi sa paghatag og libreng konsultasyon ug check-up sa mga trabahante. Atol sa validation gitambongan usab kini sa presidente sa DavNor Employee's Association.
Gisusi sa validation team ang measures of verification sa pito ka priority areas, lakip ang Diet and Physical Activity, Environmental Health, Immunization, Substance Use, Mental Health, Sexual and Reproductive Health, ug Violence and Injury Prevention. Gipangulohan ang validation nila Ms. Ashlea Julfa Guro, Ms. Jennylyn Joy Cagasa, Ms. Yasmin Mandangan, ug Mr. Elmer Gabriel Estilloso gikan sa DOH-DCHD.
Pinaagi sa maong ebalwasyon, gisuta ang kalig-on ug kaepektibo sa mga programa sa probinsya, nga nagtumong sa pagseguro nga makabenepisyo ang tanang empleyado sa usa ka himsog ug luwas nga trabahoan. Gilauman usab nga mapalambo niini ang organisasyon ug komunidad pinaagi sa pagtagad sa pisikal, mental, ug sosyal nga kahimtang sa mga trabahante.
Sa resulta sa scoring, nakakuha ang probinsya og 11 ka puntos gikan sa kinatibuk-ang 12, samtang 8 ka puntos ang narekord sa pipila ka aspeto. Bisan pa niini, naghatag ang mga validator og mga rekomendasyon, lakip ang pag-andam og espasyo alang sa recreational activities aron mapalambo pa ang kahimsog ug kaayohan sa mga empleyado.
“We need to have forcing mechanism to really push our employees to practice lifestyle, healthy behaviors. We need to create an environment para sa ilaha nga motabang sa ilaha nga maging healthy,” sulti ni Mandangan.
Ang kalampusan sa probinsya nagpakita nga ang workplace dili lamang usa ka lugar alang sa trabaho, kondili usa usab ka sentro sa kahimsog ug epektibong panerbisyo.
Writer: Lorna TripoliPhotos: Charlie Verdijo
