Aron mapalig-on ang kahanas sa mga empleyado sa kapitolyo sa pagdumala ug mapalambo ang kalidad sa serbisyo publiko, malampusong nahuman ang duha ka adlaw nga seminar-workshop nga gipahigayon sa DDNSTC VIP Clubhouse, Mankilam, Tagum City nga nagsugod niadtong Abril 22 hangtud Abril 23, 2026.

Ang maong programa gipangunahan sa Provincial Human Resource Office (PHRMO) ubos sa pagdumala ni Human Resource Officer Edwin Palero, uban sa suporta sa Civil Service Commission (CSC) XI isip kabahin sa pormal nga implementasyon sa Strategic Competency Based Human Resource Development Plan.

Sumala ni sa CSC Regional Office XI Chief Human Resource Specialist Lourdes Amerkhan, dako ang gilauman nga epekto sa maong seminar sa mga empleyado.

“Ang expectations gyud ani sa agencies, labi na sa provincial government of Davao del Norte nga pagkahuma ani murag ma put into action nila unsa man tong mga natun-an nila diri, or ma apply nila ilang knowledge dire sa pag-direct or pag-hone, pag-mold sa ilahang mga support staff para sa public service.”

Gihimo kini nga kalihokan subay sa giisyu nga Memorandum Circular No. 05, s. 2016 sa Civil Service Commission (CSC) alang sa mga empleyado nga nagtinguha nga motaas ang posisyon diin gikinahanglang makab-ot nila ang lima ka leadership competencies nga mao ang Thinking Strategically and Creatively, Developing People, Building Cooperative Inclusive Working Relationship, Leading Change and Managing Performance and Coaching for Results.

Writers: Pearl Sabasaje & August Allonar