Isip tubag sa panginahanglan sa usa ka luwas nga pasilidad nga motabang sa pag-amuma ug pagpalambo sa mga kabataan sa probinsya sa Davao del Norte, gilusad ang Ground Breaking Ceremony sa National Child Development Center (NCDC) sa Provincial Government Center, sulod sa Capitol Compound, niadtong Pebrero 13, 2026.

Sumala ni Vice Governor Clarice Jubahib, ang NCDC building maghatag og lig-ong serbisyo alang mga bata sa komunidad. Samtang, ang mga ginikanan usab makabati og dugang kasiguruhan nga adunay ahensya nga mosuporta sa kahimsog ug kalamboan sa ilang mga anak. Dugang pa niya, makatabang usab kini sa pagpalig-on ug paghatag og training sa mga child development workers sa probinsya.

“Kay ang mas kusgan nga presensya sa NCDC dinhi sa atong probinsya nagpasabot nga mas daghang bata ang matabangan, mas daghang ginikanan ang makabati nga dili sila nag-inusara sa pag-atiman sa ilang mga anak, ug mas daghan pang child development workers o teachers og masuportahan ug atong ma-train," ingun ni VG Clarice

Gipahayag usab ni Provincial Administrator Atty. Ralph Dela Cruz, representante ni Governor Edwin “Kuya Gob” Jubahib, nga natuman na ang saad nga mahatagan og igong pagtagad ang mga bata, lakip na ang mga anak sa mga empleyado sa Probinsyal nga Panggamhanan sa Davao del Norte, ilabi na kadtong naglisod sa pag-atiman samtang nagtrabaho.

“Mao kini ang katuyoan nga mahatagag igong pagtagad ang mga bata, and also to support primarily ang atong mga empleyado kay lisod jud mag atiman og bata while nagtrabaho," sulti ni Atty. Dela Cruz.

Ang maong building adunay sukod nga 15.5 floor area ug lot area nga 124 sguare meters nga gilauman nga mahuman sulod sa 175 ka adlaw. Nagkantidad kini og P2.9 milyones, samtang P1.5 milyones ang gikinahanglan alang sa umaabot nga pagpalambo sa proyekto.