Gipasalamatan ni Mayor Jonnie Libayao ang suporta ni Governor Edwin I. Jubahib ug Vice Governor Clarice Jubahib sa iyang administrasyon aron makab-ot sa lungsod sa Talaingod ang daghang kalamposan sa tuig 2025.

Sa usa ka Audio-Visual Presentation (AVP), atol sa State of the Municipality Address (SOMA) sa mayor niadtong Lunes, Marso 30, 2026, gilatid niya ang mga kalampusan sa lungsod sa niaging tuig, uban sa tabang ni Kuya Gob ug VG Clarice, ug mga ahensya sa gobyerno.

“Salamat kaayo sa atong buotan nga Governor nga si Kuya Gob Edwin Jubahib, atong pasalamatan si Kuya Gob kay ubay-ubay pud ang iyang gitabang dri kauban ang iyang anak nga atong bise gobernador (Clarice Jubahib), kana dako kaayo syag natabang sa atoa mao na karon nga makita nato nga accomplishment,” ingun ni Libayao

Gihatagan og prayoridad sa iyang administrasyon ang sektor sa kabataan, kababayen-an, ug persons with disabilities pinaagi sa nagkalain-laing programa sama sa child development, women empowerment, ug tabang alang sa mga benepisyaryo sa 4Ps.

Sa aspeto sa disaster risk reduction management sa munisipyo, gipalig-on usab ang sistema sa pagresponde sa kalamidad pinaagi sa nagkadaiyang aktibidad ug programa.

Lakip sa yang mga nahimong proyekto ang pathway concreting, multipurpose buildings, water supply systems, major road projects, drainage canals, ug pag-ayo sa water pipelines. Apil usab ang mga programa sa panglawas sama sa maternal ug child health care ug uban pang health services.

Gipalig-on usab ang sistema sa pampublikong transportasyon ug public market aron mas episyente ang serbisyo sa katawhan. Prayoridad ‘sab sa administrasyon ang mga mag-uuma isip haligi sa ekonomiya sa lungsod sa paghatag kanilag suporta pinaagi sa livelihood ug farmers’ assistance programs.

Dugang pa, gipasigarbo sa lungsod ang ilang kultura, tradisyon, ug kinaiyahan isip yutang tinubdan sa mga Indigenous Peoples, nga nahimong simbolo sa ilang identidad.