Gitanyag sa Provincial Assessor's Office (PASSO) Davao del Norte ang libreng 15 Continuing Professional Development (CPD) units alang sa mga real estate appraisers sa tibuok Rehiyon XI sa pag-renew sa ilang lisensya.
Kalabot niini, gipahigayon ang Three-Day Seminar Workshop on the Conduct of General Revision of Real Property Assessments diin gitambongan sa kapin 50 ka mga delegado gikan sa nagkalain-laing siyudad ug munisipyo sa Davao Region nga nagsugod Marso 25 hangtud Marso 27, 2026.
Subay kini sa mandato sa Republic Act No. 12001, nga naglatid sa regular nga general revision sa real property assessments matag tulo ka tuig.
Dako ang pasalamat ni Provincial Assessor Officer Engr. Lily Salazar kay Governor Edwin I. Jubahib sa suporta niini sa pagpalapad sa oportunidad sa mga propesyonal sa tibuok rehiyon aron maminusan ang gasto sa pagkuha og CPD units.
“To Kuya Gob, thank you, accredited najud ta sa Provincial Government sa Davao del Norte. Kining tanan nato nga provinces sa Region 11, naa jud sila karun dinhi, positive jud sila nga ning adto sa atong province, wala jud silay registration, gipa-libre jud ni Kuya Gob kay para tanan natong real estate appraisers makatuon sila nga libre og makakuha pa jud sila og 15 units nga CPD,” ingon ni Engr. Salazar.
Gikalipay usab sa usa ka partisipante nga si Mary Joy Melendres ang maong oportunidad tungod kay nahimo kining dakong tabang aron padayun nilang mapalambo ang ilang kapasidad isip kawani sa gobyerno. Dugang ni Melendres, dili lamang kini para kanila nga mga empleyado kundi alang usab kini sa kaayohan sa publiko ug sa mga taxpayers.
“Happy and grateful kaayo mi, because as a newly-registered real estate appraiser makatabang ni sa amoa, para sa pag update namo sa among CPD units and matabang pud namo sa pag standardize sa among mandato sa City Assessor's Office sa among LGU ug mapalambo pa namo ang among mga natun-an dinhia sa seminar. Dili lang kay ang maka benefits kay katong employees nga naa sa City Accessor's Office kondili pud kay sa mga taxpayers,” sumala ni Melendres.
