Gipasiugda sa Probinsyal nga Panggamhanan sa Davao del Norte ang Canyoneering Adventour isip kabahin sa pinakaunang AdventureHer Challenge nga gipahigayon sa Tagtugonan Falls, Barangay Gupitan, Kapalong. Gisalmotan kini sa 21 ka partisipanteng mga kababayen-an gikan sa nagkalain-laing departamento sa Provincial Capitol, gihimo kini niadtong Marso 28.

Ang talagsaong aktibidad gipangunahan sa Provincial Tourism Office uban sa pakig-alayon sa buhatan ni Vice Governor Clarice Jubahib, kini isip kabahin sa pagsaulog sa women's month.

Bug-os ang determinasyon sa mga partisipante sa ilang pagkanaog sa bantugang busay nga adunay gitas-on nga 155 feet, samtang nagkupot sa pisi isip suporta gumikan sa kadangog niini. Nisugod ang hagit sa dihang gitikangan nila ang gibana-banang 85-degree nga anggulong hagdanan sa pagsaka paingon sa waterfalls.

Matud sa pipila ka partisipante, sagol ang ilang gibati atol sa hagit kapoy ug kulba apan giila nila nga “worth it” ang kasinatian tungod sa talagsaong adventure ug sa determinasyon nga ilang napakita.

Samtang, sa wala pa gisugdan ang challenge, nagpahigayon og oryentasyon sila Roderick Parcon ug Sonny Versoza aron ipasabot ang mga pamaagi sa kaluwasan ug mga lagda sa kalihokan ug gisiguro sab sa taga Provincial Disaster Risk Reduction and Management Office (PDRRMO) nga malampuson ug mabungahon ang kalihokan ug nanguli ang mga partisipante nga luwas ug walay naangol.

Sa nasampit nga kalihukan gipamatud-an ang abilidad sa mga kababayen-an nga taliwala sa mga hagit ug pagsulay, padayon kining mobarog nga mas lig-on.