Gidagsa sa mga kababainhang empleyado sa kapitolyo ang libreng Visual Inspection for Acetate Acid (VIA) aron sa pagsuta sa cervical cancer ug breast exam screening nga gipahigayon sa Health and Wellness Audio-Visual Room, Provincial Capitol, Mankilam, Tagum City niadtong Mayo 26. Gisulti ni Dr. Kristine Nicole P. Hortel, ang Chief of hospital II sa Provincial Health Office, ug mao usab ang alternate focal sa healthy workplace, nga kini gihimo subay sa pagselebrar sa cancer awareness month.
“Since we are celebrating kadtong cervical awareness month mao nga gipamugna nato ang ginatawag nga VIA para ma-detect nato sa atong mga kababaihan nga sexually active nga mga kababaihan nato, 30 years old to 65 years old, kung naa ba sila’y risgo to have a cervical cancer,” matud ni Dr. Hortel.
Si Dr. Hortel nagpasabot sa kamahinungdanon sa sayong pagpa-check-up sa mga kababainhan aron sa paglikay sa komplikadong sakit.
“Magpa-early assessment ‘ta sa cervix nato para maiwasan siya nga dili molala kay the more hulaton nato, madugay siya, ang atoang sakit, especially sa pag-abot sa cancer, mas dako atoang gasto, mas grabe pud atoang bation,” dugang niya.
Ang libreng cervix check-up ug breast exam screening ngadto sa mga empleyado kabahin sa health and wellness program nga direktiba ni Governor Edwin I. Jubahib ug kini gipasalamatan sa mga trabahante sa kapitolyo.
“Sa among empleyado dako kaayo siyang tabang sa amoa kay instead magpa-check-up ‘ta sa gawas libre gyud ni siya. So, atoa gyud siyang i-avail kay wala ‘ta kabalo naa diay something sa atoang panlawas. So, maayo siya nga maagapan siya. Unya, pasalamat pud mi sa atoang administrasyon ni Kuya Gob Edwin Jubahib nga ila ning gihatag nga serbisyo sa amoang mga empleyado,” ingon ni Gilda Piano, empleyado sa kapitolyo.
Gipangunahan ang kalihokan sa Health Workplace Committee pinaagi sa Provincial Human Resource Management Office (PHRMO), Provincial Health Office ug uban pang stakeholders. Ang pag-examine gidumala ni Alma Ligutom, ang female reproductive health program coordinator, ug mga kaubanan.
Photo: Andrew John Hababag
