Nagmaya ang katawhan sa Island Garden City of Samal (IGCS) sa pagsulod sa Davao Light and Power Company (DLPC) kay niabot na jud ang mas barato ug dekalidad nga serbisyo nga dugay na nilang ginapangandoy.
Ang maestra nga si Rosemarie Joyce Enumerables, 53 anyos ug 30 tuig nang lumulupyo sa Barangay Cogon, IGCS, nalipay pag-ayo kay makalingkawas na jud sila sa perwisyo nga gihatag sa sigeng brownout sa ilang pamuyo, trabaho ug negosyo.
“Nalipay kaayo ko nga natuman na ang dugay na jud kaayo namo gihandum nga ang Davao Light na ang maghatag sa amo og kuryente,” sulti niya.
Si Ronald Francisco, 46, usa ka ice cream vendor, mipadayag sa iyang pasalamat kay Governor Edwin “Kuya Gob” Jubahib, tungod sa iyang paningkamot ug sakripisyo aron mapulihan ang power utility sa isla.
“Salamat Kuya Gob sa imong serbisyo nga niabot na jud ang Davao Light sa Samal… mas hayag na ang among kaugmaon,” sulti niya
Saysay niya nga dakong tabang ang barato ug saktong supply sa kuryente alang sa sama niya nga gagmay’ng negosyante.
Butyag niya nga napugos siya’g pamalit og ice nga iyang gamiton aron paghimo’g ice cream kay nadaot ang iyang ref tungod sa kanunay’ng brownout.
Mipadayeg sab sa iyang dakong kalipay si Chairman Nacer Jovani Acalal sa Barangay Libuak, IGCS, gumikan kay dakong kabahin ang sugang daguitabnon sa paglig-on sa ilang paghatud serbisyo ug pagpalambo sa barangay.
“Dako ang akong kalipay isip amahan sa barangay kay mahatag na pud namo ang maayong serbisyo,” sulti niya.
Matud niya nga dako ang kalainan kay sa kaniadto ang barangay ang nagapalit sa mga poste, sa mga electric wires ug metrohan, ug nagabayad sa pagpataod sa transformer, unya walay mobalik sa ilaha. Karon libre nang gitanyag kini sa Davao Light.
Butyag si Alcalal nga sa una duna nay pipila ka mga negosyante ang motukod unta og negosyo sa iyang barangay, pero niatras tungod sa problema sa kuryente.
Nanghinaut siya nga mobalik sila aron idayon na jud ang pagtukod sa ilang negosyo sa ilang barangay karon nga klaro na ang serbisyo sa kuryente sa pagsulod sa Davao Light sa isla.
