Pormal nang sugdan ang pagpaayo ug pagpatukod sa Sitio Kapatagan - Sitio Mangkay farm-to-market road with bridge sa Barangay Gupitan, Kapalong, atol sa gipahigayon nga groundbreaking ceremony para niini karong adlawa, Enero 23, 2026.

Ang proyekto adunay katas-on nga 4.51km, lakip ang 60m tulay. Nagkantidad kini og P135M, pinondohan sa World Bank pinaagi sa Mindanao Inclusive Agriculture Development Project (MIADP), ug sa Probinsiyal nga Panggamhanan sa Davao del Norte.

Dakong kahupayan alang sa mga residente, kadaghanan mga mag-uumang Ata Manobo, ang maong proyekto. Dugay nang nagsilbing perwisyo ang ilang daot, delikado, ug libaong dalan sa ilang panginabuhian.

Karon, tungod sa pagsugod sa maong proyekto, dili na kini mahimong babag sa paghatod sa ilang produkto sa merkado. Labaw sa tanan, mas mapalapdan na ang oportunidad ug serbisyo nga pwede mabaton sa tribu.

Gipaabot ni Brgy. Gupitan Captain Marco Pupa ang hingpit nga kalipay sa komunidad alang sa proyekto. Sulti niya, dako ang iyang pasalamat sa pondo nga gigahin sa MIADP ug sa Probinsiyal nga Panggamhanan aron mapatukod na ang maong proyekto.

Gihatagan og kabug-aton ni Governor Edwin “Kuya Gob” Jubahib nga padayon ang pagbubu sa iyang adminitrasyon og proyekto sa mga GIDAs nga komunidad aron mapadayon ang pagka-insurgency-free sa probinsiya. Hangyo niya sa mga lumulupyo, magpadayon usab sa pagkugi aron mulambo ang ilang matag pamilya, tungod andam pirme ang gobyerno nga mualalay sa ila.

Paningkamotan usab sa gobernador nga mahatdan og mga semilya sa mga tanom pinaagi sa KAAGAPAY Sustainable Livelihood Program ang komunidad aron makatabang sa ilang panginabuhian.

Sa pagpaayo niining farm to market road sa mga lagyo nga sitio sa brgy. Gupitan, Kapalong, dili lamang simpleng dalan ang matukod sa Probinsyal nga panggamhanan, apan apil na ang panaghiusa sa tanan ug kalamboan alang sa pagkab-ot sa kinabuhing hamugaway.