Pormal nang gi-turnover ug gi-inagurahan ang bag-ong multi-purpose building sa Davao del Norte Police Provincial Office (DNPPO) nga gipondohan sa Probinsiyal nga Panggamhanan karong adlawa, Marso 6, 2026.

Nagkantidad og P10 milyones ang maong proyekto, ug gilaoman nga makatabang kini aron mas mahimong produktibo ug episyente ang mga kapulisan sa pagpanalipod sa kaayohan sa mga Dabaonon.

Gipaabot ni Provincial Administrator Atty. Ralph Dela Cruz ang mensahe ni Governor Edwin “Kuya Gob” Jubahib alang sa okasyon, kung asa iyang gibatbat ang kamahinungdanon sa maong mga pasilidad aron matuman sa mga kapulisan ang ilang mandato sa pagsiguro sa kahapsay ug kaluwasan sa komunidad. Kini usa usab sa mga pamaagi aron mas mapalig-on pa ang pagsalig sa publiko sa mga kapulisan.

Nakadayeg usab sa suporta ni Jubahib si PRO 11 Regional Director PBGen Leon Victor Rosete sa iyang mensahe nga gibasa ni PCol Renante Carico. Sulti niya, swerte ang probinsiya tungod sa lig-on nga suporta sa gobernador sa epektibong pagpatuman sa balaod.

Ang maong proyekto gipondohan sa Probinsiyal nga Panggamhanan pinaagi sa Development Fund alang sa CY 2025 - Various Government Building and Facilities Project.