Gipangunahan ni Governor Edwin I. Jubahib ang ceremonial turn-over sa shelter materials ug Emergency Cash Transfer (ECT) pay-out alang sa 1,044 ka pamilya nga naapektuhan sa duha ka sunod-sunod nga linog nga mitay-og sa Davao del Norte miaging bulan nga adunay kakusgon nga 7.4 ug 6.4 magnitude. Ang seremonya gipahigayon sa DavNor Coliseum, DNSTC, Mankilam, Tagum City, niadtong Nobyembre 6.
Sa iyang mensahe, gipadayag ni Governor Jubahib nga padayon ang probinsya sa pagpangita og igong pondo aron matabangan ang mga apektado sa kalamidad.
“Naay bugas gikan sa province ug bugas pud gikan sa DSWD. Naay pang materials, kompleto nang pang materyales gikan sa lansang, sin, kahoy, kompleto na, semento, bakal, balas,”sumala ni Jubahib.
Gisulti sa gobernador nga ang gipalit nga materyales balor P15 milyones gikan sa nasyonal nga gitunol alang sa apektado sa linog sa Davao del Norte.
“Ang gobyerno makita ninyo mga magtan-aw gayud unsa ang para sa kaayohan sa katawhan, kay ang kalamidad dili man gyud nato na kontrol kay kini iya sa kinaiyahan. Pero ang mahimo nato sa gobyerno ang paglantaw sa mga damage, mga nahimong apektado sa kalamidad. Ug mao na ang trabaho namo nga mohatag og response, bisa’g dili man dayon mahatag kundili naningkamot gyud ta nga mahatud sa inyoha ang response ug tabang para makabangon pag-usab,”dugang sa gobernador.
Butyag ni Provincial Social Welfare and Development Officer Rosalinda Rapista nga unang hatdan sa materyales ang mga totally damaged sa linog ug mosunod ang mga partially damaged.
“Unahon nato’g distribute ang Tagum City nga mga materyales. Mosunod na pud ang paghuman sa totally damaged. Mosunod na pud ang partially damaged... Ang atoang materyales para sa totally damaged mo-range siya og P50,000. Kana siya validated with the team from PEO, from PADO housing division, PSWDO, and PDRRMO staff, so gi-validate ni sila,”matud ni Rapista.
Gawas sa materyales gidawat sab sa maong mga pamilya ang ₱5,362 sa partially damaged ug ₱10,341 sa totally damaged pinaagi sa ECT program.
Atol sa seremonya, gidayeg ni Mindanao Development Authority (MinDA) Secretary Leo Tereso Magno ang panaghiusa sa mga katawhan sa probinsya, uban sa pagkanayon nga adunay gobyerno nga motabang sa mga biktima sa kalamidad.
“Naay gobyerno nga mopadayon molingi ug motan-aw sa panginahanglan sa katawhan... I really heartfully extend my commendations to the people of Davao del Norte sa inyong resilience, unity, and unwavering spirit to continue to shape this province,”sulti ni Magno.
Ang distribusyon sa ECT gidumala sa DSWD FO XI, PSWDO, ug ang seremonya gitambongan nila Vice Governor Clarice Jubahib, Board Member Ronald Eliot, Kapalong Vice Mayor Maria Theresa Timbol, ug Braulio E. Dujali Mayor Margarita “Inday” Rubinos.
Writer: Lorna TripoliPhotographer: Andrew John Hababag
