Nakadawat og Deed of Absolute Sale (DOAS) ang 159 ka miyembro sa San Miguel Urban Poor Homeowners’ Association Inc. (SAMUPHAI) atol sa seremonyal nga pagpanagtag sa Barangay Cuambogan, Tagum City, niadtong Oktubre 29. Kini ang unang hugna sa tibuok 340 ka benepisyaryong makadawat sa ilang yuta.

Ang DOAS gihimo tali sa Probinsyal nga Panggamhanan sa Davao del Norte ug sa SAMUPHAI Housing Project, nga gipalig-on pinasikad sa Memorandum of Agreement (MOA) uban sa National Housing Authority.

Si Provincial Administrator Atty. Ralph Dela Cruz nga nagrepresenta kang Governor Edwin I. Jubahib, nagsulti nga tinguha sa probinsya nga matabangan ang katawhan nga makaangkon og disenteng kapuy-an.

“Makahatag ‘ta og disente, secured nga pinuy-anan, ug kadtong pinuy-anan nga matawag gyod sa atong mga kaigsuonan nga ilaha... Inubanan of course, sa atoang mga partners like National Housing Authority, DHSUD, ug apil sa programa sa atoang mga tribu. Naa pud diha ang NCIP, OPAPRU, ug mga kaigsuonan nga nibalik na sa sabakan sa balaod. So, kini ang kinatibuk-an  nga tinguha when it comes to aspeto sa housing sa KUYA GOB NG MASA Governor Edwin I. Jubahib,”matod ni Dela Cruz.

Gipasabot ni Atty. Dexter Caligdong, nagrepresenta sa Provincial Legal Office, nga ang DOAS maoy basehan para sa pagproseso sa ilang pangalan sa titulo.

“Kining nadawat nga Deed of Absolute Sale, mao ‘ni ang basehan para sa pag-process sa provincial government padulong sa ilang pangalan sa titulo puhon, kay ipa-survey pa man ‘ni. Pero kana tanan, ang moasikaso niana ang provincial government. Pero, as to the expenses ana, nakabutang sa ilang conditional sale nga sila ang mogasto ug nasabtan na pud na nila nga dili nato sila biyaan nga sa deed of sale o sa titulo lang kutob. Dapat aning programaha makatitulo na gyud sa ilang pangalan,”sumala ni Caligdong.

Samtang, Si SAMUPHAI President Elmo Espere nagpadayag sa ilang kalipay sa suporta sa probinsya.

“Siyempre, dako kaayo’g kalipay ilabi na sa mga miyembro sa SAMUPHAI nga nahatagan og Deed of Absolute Sale,” sulti ni Espere.

Writer: Lorna Tripoli
Photographer: Bembem Ulay