Gihatagan ni Governor Edwin I. Jubahib og certification of registration ang Nature’s Nuk Farms Inc. aron pormal nga makabenepisyo sa incentive program sa probinsya ubos sa Provincial Ordinance No. 2024-011. Ang kompanya, nga nahimutang sa Purok 4, La Libertad, Santo Tomas, nakadawat og opisyal nga rehistro gikan sa Davao del Norte Investment Incentives Board (DDNIIB).

Gipahigayon ang pormal nga turnover sa sertipiko niadtong Oktubre 27 sa PGO Conference Room, Provincial Capitol, Mankilam, Tagum City, diin girepresentahan ni PG-Assistant Department Head for PADO-Operations Arturo Manigo si Governor Jubahib. Kauban niya si Davao del Norte Economic Development and Investment Promotion Officer Joevynar Miedes, kuyog sila Provincial Treasurer Evelyn G. Espra, Provincial Assessor Engr. Lily M. Salazar, ug Tagum City Chamber of Commerce and Industry, Inc. Vice President Vincent Arriesgado.

Gitumong sa programa ni Governor Jubahib nga madani ang daghang negosyante sa Davao del Norte aron mamuhunan, makamugna og trabaho, ug makatabang sa pagpalig-on sa lokal nga ekonomiya.

Subay sa incentive program, makadawat ang Nature’s Nuk Farms Inc. og 100% fiscal ug non-fiscal incentives sa 2026, 75% sa 2027, ug 50% sa 2028. Gikalipay kini sa tag-iya nga si Michael Kenji Nukui, nga nagpasalamat sa suporta sa probinsyal nga panggamhanan ug mipahayag nga ang insentibo maghatag og dugang kadasig sa ilang negosyo ug makamugna og lig-on nga kolaborasyon tali  sa gobyerno ug pribadong sektor.

“We are excited to move forward with these incentives to support the government of Davao del Norte in promoting business security. And, we hope this is the beginning of a wonderful partnership,”ingon ni Nukui.

Writer/Photos: Lorna Tripoli