Mapasigarbuhong gipakita sa walo ka tribu sa Davao del Norte ang ilang kultura ug panaghiusa atol sa Ika-9 nga Tipanud Festival nga gipahigayon sa DavNor Gym, DNSTC, Mankilam, Tagum City, niadtong Oktubre 22. Ang selebrasyon ubos sa tema nga ‘Paghiusa sa mga tribu alang sa kultural nga kauswagan taliwala sa panaglahi,’ gidumala ni Indigenous Peoples’ Mandatory Representative (IPMR) Board Member Datu Ariel Macla uban sa suporta sa Provincial Tourism Office.

Matag tribu sama sa Ata, Kagan, Dibabawon, Mandaya, Manguangan, Ata-Manobo, Mansaka, ug Sama nipakita sa ilang tradisyonal nga mga awit, sayaw, ug dula.

Gihimo sab ang pinirmahay sa Tipanud 2025 Covenant sa mga IP leaders ug representante sa mga ahensya sama sa DILG, NCIP, DOLE, TESDA, DA, PNP, ug mga IPMR sa onse ka lokalidad.

Gisugdan ang Tipanud Festival pinaagi sa workshop sa mga IP Youth Leaders ug Inter-Agency Forum, diin dinhi gipadayag ang ilang mga suliran ug suhestiyon ngadto sa nagkadaiyang ahensya aron ipaabot sa lokal ug nasudnong panggamhanan ang ilang mga sentimento.

Gipadayag ni IPMR Macla ang iyang dakong kalipay sa panaghiusa sa mga tribu ug nagkanayon sa pagpadayon sa iyang suporta alang sa kalamboan sa mga tribu.

“Dili nako masulti ang gibati nako karon. Grabe ko nga pagkalipay tungod kay nagkatigum ang tanan nga mga tribu,”sulti ni Macla.

Dugang sulti ni IPMR Macla nga pagalauman sa mga tribu ang suporta sa mga opisyal sa probinsya alang sa ikalambo sa IP community.

“Lauman usab nila ang suporta sa atoang provincial government nga gipangulohan sa atong pinalanggang Gobernador Edwin Jubahib ug sa atong Vice Governor Clarice Jubahib,”ingon niya.

Samtang, gipahayag ni Provincial Tourism Officer Noel Daquioag nga ang pagpreserba sa tradisyon ug kultura sa mga tribu naghatag atraksyon sa turismo sa probinsya.

“Dako kaayo ni’g kabilinggan sa atoang turismo tungod kay ang atoang komunidad diin ang atoang tourism sites usab nahimutang kasagaran sa Davao del Norte. Naa diha ang atoang mga kaigsuonang lumad ug sila sab naghatag og color ug mabulokong ekperyensiya kabahin sa atong mga turista,”matud ni Daquioag.

Ang pagsaulog sa Tipanud Festival kabahin sa pagsaulog sa National Indigenous Peoples Month sa Oktubre.

Writer: Lorna Tripoli
Photos: BM Macla Fb page