Nikuyog sa familiarization tour sa Island Garden City of Samal (IGACOS) ang pipila ka empleyado sa kapitolyo sa Davao del Norte niadtong Oktubre 28, aron personal nga masusi ang kalamboan sa mga proyektong pang-turismo nga gipondohan sa probinsyal nga panggamhanan ug masabtan ang epekto niini sa lokal nga ekonomiya.
Subay kini sa tinguha ni Gobernador Edwin I. Jubahib nga magpadayon sa pagpasiugda ang probinsya isip usa sa mga premier tourism destinations sa nasud. Kahinumduman niadtong 2019, gigahin sa administrasyong Jubahib ang ₱200 milyon nga pondo alang sa pagpakusog sa turismo sa matag LGU, lakip na ang IGACOS.
Sa upat ka destinasyon isla nga gisuportahan sa probinsya, unang gisusi ang Sanipaan Marine Park diin makita ang 320-meter boardwalk ug Pasalubong Center nga gitukod pinaagi sa ₱9 milyon nga pondo sa kapitolyo. Ang lugar adunay 158 ka ektaryang coral reef, ang iladong vanishing island, ug 22 ka diving sites nga ginabisita sa di moubos 1,500 ka turista matag bulan.
Sunod nga proyekto ang Bandera Nature Park, usa ka talagsaong dapit nga gilibotan sa mga kahoyng mahogany diin imong mabati ang kabugnaw ug kamalinawon sa palibot. Dinhi gitukod sa probinsya ang ₱5 milyon nga coffee shop nga gilaumang mahimong sentro sa mga aktibidad sama sa day tours, seminars, ug team-building. Temporaryong sirado ang park sa kasamtangan ug giplano sa LGU IGACOS ang pag-rehabilitate sa lugar aron mahimong mas environmental-friendly ug mas mahaum ang mga pasilidad sa mga aktibidad.
Nisangko ang grupo sa Kaputian Beach Park, diin maoy venue sa paniudto. Makita didto ang mga cabana-type cottages ug bag-ong landscaping nga nagkantidad og ₱5 milyon.
Sukad pa niadtong Disyembre 2023, nagamit na kini sa mga turista. Ang lugar karon usa na ka “chill spot” nga suroyanan sa mga pamilya, bisita, ug mga lokal nga negosyante.
Ang ikaupat nga proyekto mao ang staging area ug Pasalubong Shop sa Aundanao Dive Site nga gibadyetan og P3.5-M. Wala ni naadtoan apan plano nga bisitaan sa sunod higayon.
Nihapit usab ang convoy sa IGACOS City Hall sa pagpanguna ni Assistant Provincial Administrator Arturo “Sonny” Manigo, aron sa paghatud sa Memorandum of Agreement (MOA) kang Mayor Lemuel “Toto” Reyes diin nakalatid ang pormal nga turnover sa maong mga proyekto, uban ang 10% revenue sharing nga maangkon sa probinsya.
“Kini nga MOA magatukod sa tukmang pagdumala sa pondo, pagtukod sa mga pasilidad, ug patas nga pagbahin sa kita,” matud ni Manigo.
Gikan sa city hall, nihapit usab ang grupo sa Museo Samal ug sa Samal Tourist Rest Area, diin gipaabot ang dugang kolaborasyon sa umaabot nga mga proyekto sa turismo.
Sumala ni Manigo, ang familiarization tour dili lang pagpanglaag apan usa ka lakang aron “masabtan sa mga empleyado ang kamahinungdanon sa turismo sa ekonomiya sa probinsya.” Daghang miangkon nga kini mao ang ilang unang higayon nga makaadto sa Samal, usa ka pahinumdom sa potensyal sa turismo isip pwersa sa lokal nga paglambo.
Nikuyog usab sa convoy ang mga department heads sa kapitolyo sama ni Provincial Treasurer Evelyn G. Espra, Provincial Accountant Divina A. Perez, ug ang representante ni Bise Gobernadora Clarice Jubahib.
Writer: Jun Rey VillanuevaPhotographer: Andrew John Hababag
