Gipaningkamotan sa bag-ong liderato sa mga kapulisan nga tutukan ug santaon sa hingpit ang pagkuyanap sa ilegal nga droga, pagpakunhod sa kriminalidad, ug pagpahigayon og mga inisyatiba alang sa kalinaw ug seguridad sa probinsya. Gisulti kini sa bag-ong Provincial Director nga si PCol. Glenn Cristines, atol sa gipahigayong "Meet and Greet with Media of Davao del Norte" niadtong Oktubre 14 sa DNPPO Conference Room, Tagum City.

Gibutyag nga sa kinatibuk-ang 223 nga mga barangay sa Davao del Norte, 38 na lamang ang dili pa cleared batok ilegal nga droga.

“Out of 223 barangays in Davao del Norte only 38 na lang po ang hindi cleared,” sulti ni PCOL Glenn Cristines.

Gikanayon ni PCol. Cristines nga dako og tabang ang inisyatiba ni Provincial Governor Edwin I. Jubahib sa pag-donate og mga K9 dogs ngadto sa mga kapulisan aron mamahimong katambayayong sa kampanya batok ilegal nga droga.

“We are heading that drug-free Davao del Norte because of that initiative of our Honorable Governor Edwin Jubahib. As of now, we have 10 sniffing dogs to guard our entries of Davao del Norte and at the same time we have ongoing training of another K9 dogs... I think the only province of the entire Philippines that we have that initiative,” dugang ni Cristines.

Samtang, gipasalamatan ni PCol. Cristines ang mga media practitioners uban sa pag-awhag kanila nga mamahimong kaabag sa pagtunol sa tamang impormasyon. Giawhag usab niya ang mga katawhan sa komunidad nga magpakabana ug makigtambayayong kanila sa pagsanta sa tanang matang sa kriminalidad.

Ang pakighimamat sa mga media gitambongan usab nila PLtCol. Gerardo Locaylocay, PLtCol. Philip Jefferson Ayban, PNP Provincial Information Officer PLt. Vanessa Quibel, ug ubang mga opisyal sa kapulisan nga aktibong nakig-uban sa mga magsisibya sa Davao del Norte.