Gipakusgan sa Department of Health (DOH) Rehiyon XI ang ilang kampanya sa bakuna pinaagi sa School-Based Immunization (SBI) program ug komunidad, uban sa pakigtambayayong sa Provincial Health Office, mga LGUs ug Department of Education. Kini maoy gihisgotan sa panagtigom nga gipahigayon niadtong Agosto 29 sa Acacia Hall 1, Molave Hotel, Tagum City.

Tumong sa maong miting ang pagtubag sa kakulangon sa mga kabataan nga wala nabakunahan sa miaging tuig. Subay sa datus sa miaging implementasyon sa SBI, nasayran nga daghang tulunghaan sa matag lokalidad ubos ang turnout sa mga bata nga nabakunahan. Ilang naobserbaran sa resulta sa datus nga daghan gihapon ang nagdumili ug ang uban wala gayud makadawat sa bakuna.

Sumala ni Provincial National Immunization Program Coordinator Neidel Feah Ferido, usa kini ka hagit sa Health Education and Promotion Officer (HEPO) tungod kay daghan pa gihapon ang wala nagpakabana nga mabakunahan. Gipasabot niya ang kamahinungdanon sa MR (Measles-Rubella) ug TD (Tetanus-Diphtheria) nga bakuna alang sa proteksyon batok sa mga sakit.

“Isa gyud sa factor nga gamay ta og accomplishment, ang awareness sa community and sa school. So, challege ‘ni sa atoang mga HEPO,” sulti ni Ferido.

Gihatagan usab og giya ang mga nurses aron andam sila sa hiniusang paglunsad sa SBI sa mga pampublikong tulunghaan labi na ang grade 1 ug grade 4 karong Oktubre ug Nobyembre. Dili lang mga estudyante ang target niini, apil usab ang mga out-of-school youth nga 10–19 anyos sa komunidad.

Dugang butyag ni Ferido nga giandam na usab ang usa ka micro plan sa pagpatuman sa SBI sa tibuok probinsya.

Gitambongan ang panagtigom sa mga representante gikan sa DOH Rehiyon XI pinangulohan ni Dr. Ephraim Joseph Falcunit ug NIP Program Manager Nurse Glorideta Oclarit, uban sa DepEd nurses, mga RHU, mga surveillance officers gikan sa tulo ka provincial hospitals, mga health officers, ug uban pang kaabag sa programa.

Writer: Lorna Tripoli