Balik na sa Sangguniang Panlalawigan si Board Member Ariel Macla isip Indigenous Peoples Mandatory Representative (IPMR) sa ikatulong termino. Kini tungod sa overwhelming endorsement gikan sa mga tribal leaders sa probinsya sa Davao del Norte.

Ang maong suporta gipamatud-an pinaagi sa Resolution No. 03, Series of 2025, nga gipresentar niadtong Agosto 28 sa VIP Clubhouse, DNSTC, Mankilam, Tagum City. Ang resolusyon napirmahan sa daghang IP leaders ug gi-validate sa National Commission on Indigenous Peoples (NCIP).

Nagpahayag ang mga tribal leaders sa ilang lig-on nga panaghiusa ug pagsalig sa liderato ni BM Macla aron magpadayon siya sa pagdala sa tingog sa IP community alang sa tuig 2026-2028.

Matod ni BM Macla, ang ilang mainiton nga suporta alang sa iyang ikatulong termino usa ka makasaysayanong yugto sa iyang pagpanerbisyo.

“Akong gikalipay kay akong nakita nga grabe ang pagsalig sa mga lideres sa tribu sa akoa... Rest assured atoang ma-overcome kung unsa man ang mga kuan. Karon, grabe na gani kay nagkahiusa na ang mga tribu. Of course, sa atoa pud sa provincial government, ang liderato sa atoang Vice Governor Clarice Jubahib medyo gaan-gaan na ug ganado na kaayo ‘ta molihok,  mahibalo na ‘ta nga ang atoang ipasar nga mga balaudnon, ordinansa, ug resolusyon pagasuportahan sa atoang mga kaubanan dinha,” sulti ni Macla.

Sa pakighinabi sa PTV DavNor 48 News Coverage Team, malipayon niyang gipadayag ang iyang mensahe sa IP community nga unta magpadayon kini nga panaghiusa.

“Unta magpadayon na ang atoang panaghiusa.... mobarug ta isip mga tribu,” panghinaut niya.

Writer/Photo: Lorna Tripoli