Gipasidunggan ni Governor Edwin "Kuya Gov" Jubahib ang 60 ka mga trabahante sa Provincial Capitol pinaagi sa Gantimpala Agad Award niadtong Agosto 28, sa DavNor Techvoc Center, Provincial Capitol, Mankilam, Tagum City.

Gipasabot sa representante ni Provincial Human Resources and Management Officer Edwin Palero nga si Supervising Administrative Officer Michelle Claridad, nga ang pasidungog, sama sa sertipikasyon nga gilagdaan ni Gov. Jubahib, magamit isip basehan sa pag-uswag sa employment sama sa promosyon.

Dugang ni Claridad nga bunga kini sa paningkamot, dedikasyon, ug kakugi sa pagpanerbisyo sa mga kawani sa kapitolyo. Sulti niya nga ang ubang gipasidunggan garbo sa probinsya gumikan sa pagpasar sa mga examination sama sa Civil Service ug Licensure Examination for Teachers (LET).

Gawas sa sertipikasyon gitunol sab kanila ang pahalipay nga regalo gikan sa gobernador isip pasalamat sa ilang dedikasyon sa serbisyo sibil.

Writer: Lorna Tripoli