Gipakusgan sa Probinsya sa Davao del Norte ang implementasyon sa Expanded KAAGAPAY Program (Kawsa sa Agrikulura ug Panginabuhian sa barangay), pinaagi sa pagpahigayon og oryentasyon alang sa mga benepisyaryo niadtong Agosto 22, sa New Corella Sports Complex Gym.
Gipangunahan ang maong aktibidad ni Executive Assistant to the Governor ug bag-ong gitudlong KAAGAPAY Lead, Arnel Montero, kauban sila si Provincial Veterinarian Dr. Dennis Sumaoy, Dr. Minelo Generale, ug Benjamin Reyno gikan sa Provincial Veterinary Office (PVO). Sila mao’y nagtunol og impormasyon kabahin sa hustong pag-atiman sa mga free-range chicken. Nitambong usab si Konsehal Rodulfo Comidoy, Chairperson sa Committee on Agriculture sa konseho sa lungsod.
Sumala sa mga opisyal, ang oryentasyon usa ka rekisito aron masabtan sa mga benepisyaryo ang tumong sa probinsya nga matabangan ang panginabuhian ug palamboon ang programa.
Gipasabot ni Montero nga human sa oryentasyon ipahigayon dayon ang dispersal sa mga manok ug libreng feeds ngadto sa mga kwalipikadong benepisyaryo nga nakahuman na og pagpangandam sa ilang kulungan uyon sa standard sa pagbuhi sa free-range chicken.
“Diria sa paglingkod ni Vice Gov. Clarice “Clang-clang” Jubahib ug Kuya Gob sa iyang last term nadugangan man gud ang budget sa KAAGAPAY. Gibutangan niya'g P23 milyon. So, mao na karon nagsugod mi pinakauna sa massive orientation sa KAAGAPAY Program diria sa New Corella kay sila man pud sunod sa schedule namo sa dispersal,” sulti ni Montero.
Dugang pa ni Montero nga ang susamang kalihokan ipadayon usab sa ubang mga LGUs sa tibuok probinsya aron palapdan ang benepisyo sa programa. Siya usab nanawagan sa mga People’s Organizations (POs) nga nitambong sa oryentasyon nga gilayon mopahibalo sa mga KAAGAPAY staff kung ang ilang mga manok magkasit.
“Mao nga mohangyo lang gyud mi sa atong People’s Orgnization nga kung naa mo’y nakit-an nga nagsakit, naluya nga mga piso, tawag dayon mo sa atoang mga KAAGAPAY Staff aron makahatag dayon og dinalian nga tubag o tambal sa ilang mga piso,” ingon niya.
Isip usa sa mga tinugyanan sa gobernador sa implementasyon sa programa sa KAAGAPAY, siya nanawagan sa mga POs nga ampingan ang programa.
“Sa mga KAAGAPAY benefeciaries nato nga kini nga programang KAAGAPAY gihatag, gimugna gyud ‘ni ni Kuya Gob alang sa inyong panginabuhian. So, hatagan lang ninyo og paghigugma ang programa aron ma-accomplish ni Kuya Gob o ma-achieve ni Kuya Gob ang iyang pangandoy nga walay katawhan sa Davao del Norte nga maglisud,” dugang ni Montero.
Nagpaabot sab og pasalamat ang pipila ka mga taga-Barangay El Salvador ngadto kang Gov. Jubahib tungod sa KAAGAPAY, nga sila andam na sa pagdawat sa programa.
“Para sa manok namo, okay na. Kompleto na. 300 square meters ang amoang kadak-on sa amoang kulongan,” matud ni Carlos Abordo, usa sa mga benepisyaryo.
“Kaming mga asosasyon malamboon ang amoang pagpaningkamot ug daghan kaayong salamat sa iyang suporta,” pasalamat ni Victoria Alpafara, taga-El Salvador, New Corella.
Writer: Lorna TripoliPhotographer: Andrew John Hababag
