Naglunsad ang Provincial Government of Davao del Norte (PLGU-DavNor) og public auction alang sa mga wala na gigamit nga sakyanan ug uban pang kagamitan sa gobyerno niadtong Agosto 18, sa VIP Clubhouse, DNSTC, Mankilam, Tagum City. Mitambong sa kalihokan si Provincial Administrator Atty. Ralph Dela Cruz nga misilbi nga representante ni Governor Edwin I. Jubahib.

Ang Provincial Appraisal and Disposal Committee (PADC) nga giulohan mismo ni Gov. Jubahib ug gilangkoban sa mga departamento sama sa Provincial Treasurer’s Office (PTO) ug Provincial General Services Office (PGSO), misubasta sa mga sakyanan ug gamit nga wala na magamit. Lakip sa mga items mao ang Nissan Frontier 4X4, Isuzu Fuego Truck, Nissan Navarra 4X2, mga motorsiklo, Toyota Tamaraw FX, ug uban pang metal, plastic, ligid, ug mga battery. Gitan-aw sa publiko ang proseso nga gisaksihan usab sa mga representante gikan sa Commission on Audit (COA).

Sa iyang mensahe, gipadayag ni Atty. Dela Cruz nga ang pagdumala sa disposisyon misunod sa Joint Circular #2024-1 nga giisyu sa COA ug DBM.

“We are gathered today for the public bid opening for the auction of unserviceable properties of the Provincial Government of Davao del Norte. Kini nga proceeding is in full accordance with the established procedures of the PLGU Davao del Norte and is pursuant to Commission on Audit (COA) and Department of Budget and Management Joint Circular #2024-1, which governs the disposal of government properties,” sulti niya.

Giablihan ni Atty. Dela Cruz ang mga siradong envelope nga adunay auction form, rekisitos sama sa valid ID, ug 10 porsyento nga auction bond base sa minimum auction price sa matag item. Human sa pagpresentar sa publiko, gilayon giila ang mga highest bidders, samtang ang ubang partisipante na-disqualify tungod sa kakulang sa rekisitos, gibalik ra usab dayon sa PADC ang 10 porsiyentong auction bond sa mga bidders human sa diskwalipikasyon.

Gipahibalo sa komitiba ngadto sa mga nakadaog nga magpaabot sa dugang nga anunsyo o notice gikan sa PADC alang sa sunod nga proseso.

“Maghulat mo sa pagkontak sa PADC members or sa secretariat kay i-prepare pa namo ang notice of award ninyo. So, hulaton gyud ninyo ang tawag namo until such time nga wala pud ninyo nabayaran ang dapat ninyo bayaran, dili ninyo pwede makuha ang mga items,” matud sa PADC Secretariat.

Writer: Lorna Tripoli